Ն.ՓԱՇԻՆՅԱՆԸ ԳՏՆՎՈՒՄ Է ԱՊՕՐԻՆԻ ԿԱԼԱՆՔԻ ՏԱԿ: ԻՍԿ ԴԱՏԱՐԱՆԸ ՓՈՐՁՈՒՄ Է ԿՐԿՆԱԿԻ ԱՆԳԱՄ ԿԱԼԱՆԱՎՈՐԵԼ ՆՐԱՆ
- Այսօր Երեւանի Կենտրոն-Նորք-Մարաշ համայնքների ընդհանուր իրավասության դատարանը կորոշի «Հայկական ժամանակ» թերթի գլխավոր խմբագիր Նիկոլ Փաշինյանի խափանման միջոցը, թեեւ նրա նկատմամբ արդեն 2 օր է որպես խափանման միջոց կիրառվել է կալանավորումը: Նշենք, որ երեկ այդ հարցով` դատավոր Էդիկ Ավետիսյանի գլխավորությամբ ընթացող դատական նիստը Ն.Փաշինյանի պաշտպանների միջնորդությամբ հետաձգվել է մինչեւ այսօր ժամը 14: 30-ը, որին մասնակցել են Հատուկ քննչական ծառայության խմբի ղեկավար Վահագն Հարությունյանն ու այս գործը քննող քննիչ Վաղինակ Մկրտչյանը: «Բանն այն է, որ քրեական գործի նյութերը, միջնորդությունները քննչական մարմնից մեզ են տրամադրվել կամ դատական նիստում, կամ դրանից կես ժամ առաջ, եւ որպեսզի մենք մեր դիրքորոշումը հիմնավորված ու հավուր պատշաճի ներկայացնենք, խնդրել ենք հետաձգել նիստը, որը բավարարվել է», - լրագրողների հետ զրույցում ասաց Փաշինյանի պաշտպաններից Տիգրան Աթանեսյանն ու նշեց, որ դատավորն ու մեղադրողները դատարանում իրենց շատ նորմալ են պահել, շատ ձգված ու պարկեշտ են եղել: Իսկ պաշտպան Արա Զաքարյանն էլ հավելեց, որ Նիկոլ Փաշինյանին մեղադրանք առաջադրելուց հետո նա պետք է հարցաքննվեր, սակայն հրաժարվել է ցուցմունք տալուց:
Այս ամբողջ պատմության մեջ, սակայն, ամենահետաքրքիրն այն է, որ ըստ էության, դատարանը Նիկոլ Փաշինյանի նկատմամբ ցանկանում է կրկնակի անգամ խափանման միջոց կիրառել, որն ուղղակի ապօրինություն է: Մասնավորապես` մեզ հետ զրույցում Ն.Փաշինյանի պաշտպան Արթուր Գրիգորյանն ասաց. «Քննիչները ներկայացրեցին միջնորդություն` կալանքը որպես խափանման միջոց կիրառելու հարցի վերաքննարկում նշանակելու մասին: Նրանք ուզում են, որ եւս մեկ անգամ քննարկվի Փաշինյանին կալանավորելու հարցը, բայց այստեղ ամենահետաքրքիրն այն է, որ մի կողմից ասում են, որ դատարանն արդեն նրան հեռակա կարգով կալանավորել է, բայց մենք նորից պետք է ջնջենք ու զրոյից սկսենք»: Այսինքն` ստացվում է, որ արդեն կալանավորված անձին եւս մեկ անգամ ուզում են կալանավորել: Հարցին, թե ինչո՞ւ է դատարանը նման քայլի գնում, Փաշինյանի մեկ այլ պաշտպան` Արա Զաքարյանն ասաց. «Խնդիրը կայանում է նրանում, որ վճռաբեկ դատարանը եվրոպական դատարանի որոշումներ հետազոտելով մեկնաբանություն է տվել, որ եթե անձը հետախուզման մեջ է գտնվում, այսինքն` նրա նկատմամբ հեռակա կարգով կալանք է տրվել, ապա նրան հայտնաբերելուց հետո պետք է նորից ներկայացվի դատարան եւ կրկին անգամ այդ հարցը քննարկվի: Ես ամենեւին համաձայն չեմ վճռաբեկ դատարանի այս ձեւակերպմանը, քանի որ դատարանն արդեն որոշում է կայացրել երկու ամսով Ն.Փաշինյանի նկատմամբ կալանք կիրառել: Մյուս կողմից` վճռաբեկ դատարանը, նման ձեւակերպում տալով, ըստ էության, դրդում է ստորադաս ատյաններին քննարկել մի հարց, որը օրենքով նախատեսված չէ: Այսինքն` դրդում է, որ դատարանները խախտեն Եվրոպական կոնվենցիայի 5-րդ հոդվածը, այսինքն` քննեն մի հարց, որը մեր օրենսդրությամբ նախատեսված չէ»: Նրա ներկայացմամբ` այս իրավական կազուսի մեղավորը վճռաբեկ դատարանն է, որը փոխանակ իր բուն առաքելությունն իրականացնի, այսինքն` ապահովի օրենքի միատեսակ կիրառելիություն, փորձել է օրենսդրական նախաձեռնությամբ հանդես գալ, որի հիմնական հեղինակը «իրեն Կոնվենցիայի 5-րդ հոդվածի մասնագետ հռչակած» դատավոր Դավիթ Ավետիսյանն է: Նկատենք նաեւ, որ ըստ պաշտպան Տիգրան Աթանեսյանի` օրենքի խախտում է ոչ միայն կրկնակի անգամ կալանավորելու դատարանի ցանկությունը, այլ նաեւ այն, որ Նիկոլ Փաշինյանի ի հայտ գալուց հետո նա կալանավորվել է: Բանն այն է, որ, ըստ նրա, դատարանն իրավունք չունի վճիռ կայացնել առանց մեղադրյալի կամ նրա պաշտպանների ներկայության: «Անձը պետք է անպայման գտնվի դատարանում, երբ իր վերաբերյալ վճիռ է կայացվում: Դատարանը դա նոտար չի, որ կնիք դնի ինչ-որ որոշման վրա: Դատարանը նրանով է դատարան, որ անձը կարողանում է դատավարության ընթացքում ներկայացնել իր փաստարկներն ու ապացույցները: Դա է համարվում դատարան, ոչ թե նրանց ձեռքին եղած կնիքները», - ասաց Տ.Աթանեսյանն ու հավելեց. «Այսինքն` նրանք կայացրել են ապօրինի որոշում եւ հիմա էլ շարունակում են մի ապօրինի որոշման վրա երկրորդը կատարել»: Նույն խնդրի առնչությամբ, «Պրեզումցիա» իրավաբանական կենտրոնի ղեկավար, նախկին դատավոր Պարգեւ Օհանյանի կարծիքը մի փոքր այլ էր: Նրա ներկայացմամբ` ընդունված պրակտիկա է, որ հետախուզման մեջ գտնվողի նկատմամբ կալանքի սանկցիա է տրվում, սակայն ապօրինություն է, երբ այդ երկու ամիսը լրանալուց հետո այդ ժամկետը չի երկարացվում եւ հետախուզվողի ի հայտ գալու ժամանակ նրան կալանավորում են: «2 ամիսը լրանալուց 2 օր առաջ, անկախ նրանից, հետախուզվողը հայտնաբերվել է, թե` ոչ, նախաքննական մարմինը պարտավոր է դիմել դատարան այդ կալանքի ժամկետը երկարացնելու համար: Այսինքն` երկու ամիսը լրանալուց հետո այդ կալանքի սանկցիան այլեւս չի գործում», - ասաց Պ.Օհանյանը: Ի դեպ, նշենք, որ ըստ Նիկոլ Փաշինյանի պաշտպանների` նրան կալանավորելու սանկցիա տրվել է ընդամենը մեկ անգամ, 2008 թվականի փետրվարի 26-ին, որը կապված է եղել 2007 թվականի հոկտեմբերի 23-ին տեղի ունեցած դեպքի հետ, երբ ոստիկանները բռնություն էին կիրառել հանրահավաքի թռուցիկներ տարածող գործիչների, այդ թվում Փաշինյանի նկատմամբ: Ասել կուզի` 2008 թվականի փետրվարի 26-ից երկու ամիս անց, այսինքն` ապրիլի 26-ից հետո Փաշինյանի նկատմամբ կալանքի սանկցիայի որոշումը կորցրել է իր ուժը, եւ հիմա Փաշինյանը գտնվում է ապօրինի կալանքի տակ: Բոլորի համար էլ պարզ է, որ այս արատավոր ու անօրինական պրակտիկան մեր երկրում գործել է տարիներ շարունակ, սակայն հաշվի առնելով, որ հետախուզվող անձինք հիմնականում եղել են քրեական հանցագործներ, այդպես էլ որեւէ մեկը չի բարձրաձայնել դրա մասին: Այլ է խնդիրը լրագրող, քաղաքական գործիչ ու հասարակության շրջանում մեծ ճանաչում ունեցող Նիկոլ Փաշինյանի դեպքում, ու դատարանը, ամենայն հավանականությամբ, կրկին կալանքի սանկցիա տալով փորձելու է կոծկել ներկայումս նրա կալանքի ապօրինի լինելը: Եվս մեկ հիշեցում. թեեւ ԵԽԽՎ-ն 1677 բանաձեւում կոչ է անում ՀՀ իշխանություններին, որ մարտի 1-ի գործերով հետախուզման մեջ գտնվողների նկատմամբ մինչեւ դատավարության սկիզբը չկիրառվի կալանք, սակայն գրեթե բոլորի համար էլ ակնհայտ է, որ ապօրինաբար Ն.Փաշինյանին կալանած իրավապահները կանտեսեն ԵԽ կոչը: Ընդ որում` այդ մասին երեկ ասել է նաեւ Փաշինյանի կինը` Աննա Հակոբյանը, նշելով, թե համոզված է, որ Ն.Փաշինյանի նկատմամբ որպես խափանման միջոց կկիրառվի կալանքը:
- Արթուր Խեմչյան
ԼՈՒՐԵՐ ՀԱՅԱՍՏԱՆ
ՕՆԼԱՅՆ ԼՈՒՐԵՐ
ԻՆՖՈՐՄԱՑԻԱ
ԻՄ ԱՐՄԹԱՈՒՆ
Ինչպե՞ս թողնել ծխելը
Ինչպե՞ս գրել Հայերեն Windows XP միջավայրում
Սույն կայքում հրատարակված նյութերը վերցված են բաց աղբյուրներից և պաշտպանված են հեղինակային իրավունքիով։ Արգելված է սույն կայքում հրատարակված նյութերի վերարտադրումը առանց իրական հեղինակի գրավոր թույլտվության։ Եթե ցանկանում եք հանել Ձեզ պատկանող նյութը, ապա ուղարկեք մեզ, պատկանելությունը վկայող փաստեր և տվյալ նութը անմիջապես կհանվի։ Բոլոր նյութերը հրատարակված են միայն ինֆորմացիոն նպատակով և մենք պատասխանատու չենք դրանց հավաստիության համար։