ՎԱՀԱՆ ՀՈՎՀԱՆՆԵՍՅԱՆ. «ԵՍ ԿԱԽՈՒՄ ՈՒՆԵՄ ՄԻԱՅՆ ԻՄ ԺՈՂՈՎՐԴԻՑ»
Երեւան (Երկիր) - Հայաստանի Հանրային հեռուստաընկերության «Եվրապոլիս» հաղորդաշարի փետրվարի 13-ի հյուրն էր ՀՀ նախագահի թեկնածու, ՀՅԴ Բյուրոյի անդամ, ԱԺ փոխնախագահ Վահան Հովհաննեսյանը: Ստորեւ ներկայացնում ենք հատվածներ հեռուստալրագրողներ Արտակ Հերիքյանի եւ Տաթեւիկ Բաղդասարյանի հետ Վահան Հովհաննեսյանի հարցազրույցից։
- Պարոն Հովհաննեսյան, նախագահի տարբեր թեկնածուների սատարող թերթեր այս օրերին տարբեր փաստաթղթեր են, այսպես ասած, գաղտնազերծում: Նկատի ունեմ, որ նորից ասպարեզ են իջնում «Վահան Հովհաննեսյան + 31», «Դրոյի» գործով հրապարակումներ «Հայկական ժամանակ» օրաթերթում: Միեւնույն ժամանակ, «Հայոց Աշխարհ»-ում հրապարակվում է Աբդուլահ Գյուլին Րաֆֆի Հովհաննիսյանի ուղարկած նամակը: Այստեղ կոմպրոմատների պատերազմ է ստացվում մի տեսակ: Որպես պարզապես Հայաստանի քաղաքացի` այս պատերազմում ինչպե՞ս կողմնորոշվել:
- Ես` որպես քաղաքացի, նման բաներից զզվում եմ: Բան ունեիք ասելու` ժամանակին ասեիք: Հիմա, իհարկե, ես հասկանում եմ, ՀՀՇ-ի նյարդերը չդիմացան: Սա ապացույց է, որ նրանք մեզ հետ գաղափարական զենքով չեն կարող կռվել, նորից նավթալինից հանել են «Դրոյի» եւ «31»-ի գործերը: Ես չեմ էլ կարդացել, բայց լսել եմ, որ նորից այդ հանգամանքը սկսում է շրջանառության մեջ դրվել: Հարց է առաջանում` եթե այդպես է, պարոն Տեր-Պետրոսյան, դու ինչի՞ էիր գալիս Դաշնակցության գրասենյակ ու ասում, որ ցավալի է, որ այդպես ստացվեց: Բա եթե այդպես է, 90-ականների վերջին ինչո՞ւ էր իշխանությունը ուղղակի աղաչում այն ժամանակվա Դաշնակցության Բյուրոյին եւ մեզ` բանտարկված վիճակում, թե` մի ձեւ գտեք, դուրս եկեք, չենք կարողանում հաստատել մեղադրանքները: Բյուրոյին այն ժամանակ առաջարկում էին` ձեւ գտեք Հրանտին արտաքսենք, բայց հանենք բանտից: Մենք հրաժարվեցինք, ասացինք` չէ, մենք շարունակելու ենք նստել: Դե, ապացուցեք, ինչ որ ասել էիք: Թող իրենք էլ նման կեցվածք որդեգրեին: Թող չփախչեր Վանոն, էդքան արդա՞ր էր` թող գար-կանգներ դատարանի առաջ, չծլկեր երկրից, երբ որ հիմա իր բացակայությամբ հերոսացնում են: Փաստաթուղթը միշտ էլ փաստաթուղթ է:
Օրինակ` մի փաստաթուղթ է Սերժ Սարգսյանի նամակը Լիպարիտյանին: Պարոն Սերժ Սարգսյանը այն ժամանակ Լեւոն Տեր-Պետրոսյանի նախարարն էր: Եթե նա սխալ էր արել, թող Լեւոն Տեր-Պետրոսյանը ձեռքից բռներ, չթողներ այդ նամակը գրել: Իսկ եթե նա ճիշտ է արել, ինչո՞ւ եք հիմա հիշում: Այսինքն` բարոյականության մթնոլորտ բացարձակապես չկա նման հրապարակումներում: Ես չեմ էլ կարծում, որ մյուս կողմից նման հրապարակումներով հարվածելը քաղաքական հակառակորդին ճիշտ ձեւ է, բայց քանի որ չեմ կարդացել, հրապարակումներին ամբողջությամբ ծանոթ չեմ, հիմա այդ թեմայի մեջ վախենում եմ մտնել:
- Տեսակետ կա, թե նախագահական ընտրությունների ելքը վճռվում է դրսում: Ըստ Ձեզ` որքանո՞վ է ենթակա նախագահի ընտրությունը արտաքին ազդեցություններին:
- Փոքր երկրների վրա մեծերը միշտ փորձում են իրենց ներքին քաղաքականության մեխանիզմներն օգտագործելով` ճնշել: Սա ակնհայտ է եւ հայտնի է: Բայց փոքր երկրների պատասխանատուները, ղեկավարները պետք է կարողանան ամեն գնով, ամեն ջանքի գործադրմամբ նման նկրտումները հետ մղել, թույլ չտալ այդ բանը: Բայց այսօր մեզանում հակառակ պրոցեսն է: Ես տեսնում եմ, որ դրսից «տղա կանչելու» կամ «տղայի մոտ զեկույցով վազելու» գործընթացը դարձել է մոդայիկ: Մեր կուսակցությունը, օրինակ, նման բան երբեք իրեն թույլ չէր տա: Ես ձեզ անկեղծ ասեմ` հենց այս օրերին սոցիալիստական ինտերնացիոնալի ճանապարհով, որպես կոլեգայի, ինձ հրավիրել էին Բրիտանիայի վարչապետ պարոն Բրաունը եւ Իսպանիայի վարչապետ պարոն Սապատերան: Հանդիպումը նրանց հետ գուցեեւ իմ արտաքին իմիջի կամ իմ կուսակցության հզորությանը, ազդեցությանը իսկապես մի բան կավելացներ, բայց սա նախագահական ընտրություն է: Ես մենակ իմ ժողովրդի հետ գործ ունեմ:
Գյուղերում, հեռուստաէկրաններով, քաղաքներում ես իմ ժողովրդի հետ եմ առնչվում: Այնպես որ` մենք պատասխանեցինք, որ, ցավոք, մենք այնուամենայնիվ զերծ ենք մնում հիմա նման հանդիպումներից: Եվ ես չեմ հասկանում` ինչու, օրինակ, Ռուսաստանի պաշտոնյաներն իրենց կարող են թույլ տալ ասելու, որ այս թեկնածուին մենք պաշտպանում ենք, ամեն ինչ կանենք նրա հաղթանակի համար: Բա որ մի ուրիշ երկիր դրանից օգտվելով ասի` ես էլ այս թեկնածուին եմ սիրում ու պաշտպանում, եւ ես էլ ամեն ինչ նրա հաղթանակի համար կանեմ... Դարձնում ենք Հայաստանը ուրիշների շահերի բախման թատերաբեմ, ինչը մեր կուսակցությունը եւ անձամբ ես բացառում ենք: Մենք սա ճիշտ չենք համարում:
- Դուք բազմիցս դեմ եք արտահայտվել այն բանին, որ, ըստ էության, ամբողջ երկրի ղեկավարումը կենտրոնանում է մեկ քաղաքական ուժի ձեռքում: Սա մի մոդել է, որ բավականին արդյունավետ է գործում աշխարհի շատ պետություններում: Ինչո՞ւ պետք է Հայաստանը այստեղ օրիգինալ լինի:
- Շատ հետաքրքիր հարց եք դուք բարձրացնում: Ես իսկապես ցավում եմ, որ այս հարցի շուրջ այսպես զարմացած դեմքերով խոսում են, իմ կարծիքով, իրավաբանական լուրջ գիտելիքներ ունեցող մարդիկ եւ ցավում եմ նաեւ, որ մարդիկ, որոնք անձնական զրույցի մեջ ինձ հետ միշտ համաձայնում են, որ ես այս հարցերում ճիշտ եմ, այնուամենայնիվ, պարտավորեցնում են պաշտպանել անարդար գործը: Տեսեք, մի քիչ նենգափոխում կա մեր խոսքերի: Մենք ասում ենք, որ միահեծան իշխանությունը վտանգ է: Բայց միահեծանությունը նրա մեջ չէ, որ խորհրդարանը նույն կուսակցությունից է, կառավարությունը եւ նախագահը` նույնպես:
Միահեծանությունը վտանգ է դառնում, երբ այդ նույն երկրում կա տնտեսական մոնոպոլիա, տնտեսական միահեծանություն, տնտեսական մենաշնորհ, եւ, երբ այդ տնտեսական մենաշնորհը քաղաքական մենաշնորհի հետ է սերտաճում: Դրա համար թող զարմացած չնայեն Սահմանադրությանը, իբր` չեն հասկանում` ես ինչը նկատի ունեմ միահեծանություն ասելիս: Թող զարմանքով իմ աչքերի մեջ նայեն ու ասեն, թե Սահմանադրության մեջ որտե՞ղ է ամրագրված տնտեսական մոնոպոլիան թույլ տալը:
Սահմանադրության մեջ է՞ գրված, օրինակ, որ մաքսազերծված կետերում ապրանքատեսակների ցուցակներ կան, որոնք թույլ է տրվում ներմուծել միայն շատ սեղմ, նեղ շրջանակի մարդկանց: Այ, սա եթե մենք վերացնենք, այդ դեպքում, իհարկե, քաղաքական միահեծանությունը քաղաքական ոչ մի խնդիր չի ներկայացնի: Ժողովուրդը վստահել է այս կուսակցությանը, ուրեմն բնական է, որ այդ կուսակցությունը կարող է ինչ-որ ժամանակահատվածում իրականացնել երկրի ղեկավարման գործառույթները: Բայց երբ այդ նույն կուսակցության ներկայացուցիչները (իրականում` ոչ էլ կուսակցության, այլ վերնախավ են թափանցում որոշ անձեր) նաեւ տնտեսական մենաշնորհին են տիրապետում, ուրեմն այդ ժամանակահատվածի երկարությունը ժողովրդի որոշումով չի կայացվում, վտանգ կա, որ սա կհավերժանա: Այ, այս տեսակի բաներից է զզվել ժողովուրդը, որ մոլորված վիճակով` փրկությունը վատից վատագույնի մեջ է որոնում` երեկվա օրվա: Այ, այս բաները չպետք է արվեին, որ այսօր մենք չխոսեինք հնարավոր բախումների վտանգի մասին:
- Մենաշնորhները վերացնելու ի՞նչ մեխանիզմ եք դուք առաջարկում: Թեկնածուներից Վազգեն Մանուկյանը, օրինակ, առաջարկում է քվոտաներ սահմանել եւ մրցութային կարգով տրամադրել ձեռներեցներին: Դուք կոնկրետ մեխանիզմ ունե՞ք:
- Դա էլ է մեխանիզմ: Որոշ տեղերում այդ մեխանիզմը գործում է: Հայաստանի այսօրվա պայմաներում` չեմ կարծում, որ քվոտավորման մեխանիզմը գործի, որովհետեւ պատկերացնո՞ւմ եք` ինչպես կարող է տեղի ունենալ քվոտայի համար տենդերը: Պատկերացնո՞ւմ եք` ինչ շրջանակ կարող է այդ տենդերներում հաղթել: Այստեղ սոցիալիզմին կարելի է հասնել բացարձակ լիբերալիզմով. բացարձակապես ազատ արձակեք: Սա կնպաստի գների իջեցմանը: Իհարկե, կան ստրատեգիական ապրանքներ, բայց կներեք, ձեթն ու կարագը ստրատեգիական ապրանք չե՞ն: Ստրատեգիական ապրանքների պարագայում ես համարում եմ, որ պետությունը իր ֆիքսված քվոտան պետք է ունենա, որպեսզի ծայրահեղ վտանգի պայմաններում կարողանա ապահովել ժողովրդին: Մնացածը թողեք ազատ, բայց դա անելու համար պետք է այդ մենաշնորհների գլխին նստած կլաններից կախված չլինես:
Հիմա մենք ի՞նչ ենք ուզում` փոխենք այդ կլանների տերերի ազգանուննե՞րը, թե՞ ուզում ենք այդ կլանները չլինեն: Այն մի բեւեռում, որը ձեւավորվել է հին ու նոր իշխանությամբ, առավելագույնը կարող է լինել կլանների` այսպես ասած դոների, ղեկավարների ազգանունների փոփոխություն: Միջին օղակը, մեկ է, նույնը կմնա: Էլի առնետավազք տեղի կունենա, ու ոչ մի բան չի փոխվի: Մեր պարագայում` այս մյուս բեւեռի պարագայում, ամբողջությամբ կլուծարվեն այդ կառուցները, որովհետեւ մենք դրանց ո՝չ որեւէ բան ենք պարտք, ոչ էլ վախենում ենք:
- Դուք առաջարկում եք մայրաքաղաքի եւ մարզերի անհամաչափ զարգացման խնդիրը հաղթահարելու, նաեւ մարզերում նոր աշխատատեղեր բացելու համար հարկային արտոնություններ նախատեսել: Բայց արդյո՞ք այդ հարկային արտոնությունները արտոնյալ նոր գործարարների խավ ձեւավորելու ճանապարհ չեն բացի: Ինչպե՞ս վերահսկել դա:
- Արտոնությունը չպիտի տրվի ցմահ: Օրինակ` մեր օլիգարխները այդ արտոնությունը ցմահ են ստացել, եւ եթե իշխանափոխություն տեղի չունենա կամ տեղի ունենա վատագույն սցենարով, այդ արտոնությունները էլի կպահպանվեն կամ կտրվեն ուրիշների, բայց էլի ցմահ: Արտոնությունը պիտի տաս մարդուն, որը, ի վերջո, քո երկրի համար կարեւոր տնտեսական, արտադրական ուղղությունն է զարգացնում: Բայց դու դա պետք է սկզբից որոշես: Դու չպետք է ամեն ինչ գցես շուկայի վրա ու ասես` շուկան ամեն ինչ կարգավորում է: Դա էլ, ի միջի այլոց, սուտ է: Ցանկացած, սովետական տերմինով ասած` կապիտալիստական երկրում գները լավ էլ հսկողության տակ է պահում պետությունը: Այնպես չէ, որ ազատ է արձակել, ինչ ուզում է` կլինի: Այդպիսի բան չկա, մեզ ուղղակի խաբում են: Բայց ես շատ հեռու եմ էժան պոպուլիզմից` կգամ, չորս անգամ հարկերը կիջեցնեմ, բոլորին ոսկե ձկնիկ կնվիրեմ կամ կախարդական փայտիկ... Չունեմ ես նման բաներ, բայց ես վճռականություն ունեմ բյուջեի մուտքերը չպակասեցնել, այլ ավելացնել, արտոնությունները, օրենքը, հարկային դաշտը ազատել այսօրվա շրջանցողներից, որպեսզի կարողանամ ինչ-որ արտոնություններ տալ հեռավոր մարզերում, սահմանամերձ գոտիներում ներդրում կատարողներին: Իհարկե, դա էլ չի լինելու ցմահ: Դա լինելու է այնքան ժամանակ, մինչեւ որ այդ մարզերը իրենց զարգացման մեջ գոնե առնվազն մոտենան Երեւանին:
- Ենթադրենք` կգնան, կձեւակերպեն հեռավոր մի մարզում բիզնես եւ Երեւանի կենտրոնում լավ ռեստորան կաշխատեցնեն, ի՞նչ եք անելու:
- Կբռնենք:
- Արտասահմանում ընդունված է հաշվել, թե նախընտրական խոստումներն ինչ են արժենալու իրականացնելու դեպքում: Դուք հաշվե՞լ եք` սոցիալական ծրագրերի իրականացման համար բյուջեի ծախսային մասը որքան պետք է կազմի:
- Ես պետք է ասեմ, որ տնտեսագիտական թիմը, որ աշխատել է իմ ծրագրի վրա, շատ բարձր մակարդակի է: Դրանում համոզվել է նաեւ այսօրվա մեր կառավարությունը, որովհետեւ, եթե հիշում եք, մենք բավական սոցիալական խիզախ ծրագրեր էինք առաջարկում խորհրդարանական ընտրությունից առաջ: Այն ժամանակ մեղադրվում էինք ռոմանտիկ լինելու մեջ, իբր այս ամենն իրականանալի չէ: Ի վերջո, անցան ընտրությունները, սկսեցին իրականացնել: Կառավարության ծրագիրը, որ բերվեց Ազգային ժողով, եթե հիշում եք, այն ժամանակ վարչապետի ելույթի մեջ մի քանի անգամ նշվեց, որ շնորհակալ է Դաշնակցության խմբակցության տնտեսագետներից: Արա Նռանյանն էր դա, Արծվիկ Մինասյանը եւ ուրիշներ: Վարչապետը տեսավ, որ հենց իրեն` որպես վարչապետի, հենց իրենց` որպես կառավարության ձեռնտու է, եւ ընդունեց: Հիմա բարձրացնում են աշխատավարձն ու թոշակները, եւ ոչ ոք չի էլ հիշում, որ մենք ռոմանտիկ էինք, եւ իբր թե անիրականանալի բաներ էինք ասում:
Այո, այդ ամեն ինչը հաշված է, եւ պետք է ավելանան սոցիալական ծախսերը, պետք է անպայման ավելանան գիտությունը եւ մշակույթը, որովհետեւ եթե մենք այդտեղ էլ ներուժը կորցնենք, մենք այլեւս կերպարանափոխվում ենք որպես ազգ ու պետություն: Պետք է փրկել մեր գիտական եւ մշակութային ներուժը: Դրա համար լուրջ ավելացումներ, փոփոխություններ այս ասպարեզում նախատեսված են, եւ դա բյուջեի այլ հատվածներին չի հարվածի, որովհետեւ ես կարծում եմ` արդեն այսօր երկուսուկես միլիարդանոց բյուջեն ուշացած է, ժամանակավրեպ: Մենք կարող էինք արդեն չորս միլիարդի մասին խոսել:
- Ձեր կանխատեսումը. ընտրությունները քանի՞ փուլով են անցնելու:
- Ես կարծում եմ` երկու, անշուշտ, եթե ես առաջինում չհաղթեմ:
- Իսկ ընդդիմության միավորման ընթացքի մասին ինչ կասեք:
- Մինչեւ փետրվարի 9-ը ինչ որ պետք է լիներ, եղավ: Գաղտնիք չէ` մենք էլ ենք բանակցել տարբեր քաղաքական ուժերի հետ: Բնականաբար, մեզ համար միեւնույն չէ, թե մեզ ով կմիանա: Նա պետք է առնվազն գաղափարական, քաղաքական իմաստով մեզ ավելի հարազատ մեկը լինի:
- Կա՞ն միավորումներ, որոնք ի սկզբանե դուք բացառում եք ձեզ հետ:
- Ես որովհետեւ արդեն նկարագրեցի` ինչ են այսօր արդեն, իմ կարծիքով, ձեւավորված, ֆորմալացված երկու բեւեռները, մեզ հակառակ բեւեռի հետ` հին իշխանություն, այսօրվա իշխանություն, որոնք, իմ կարծիքով (թեեւ նրանց մեջ հիմա մենամարտ է գնում) ի վերջո, նույն բեւեռն են, այդ բեւեռի հետ այս պայմաններում մենք չէինք կարող միավորվել: Իսկ մնացածների մեջ կային ուժեր եւ կան ուժեր, որոնց հետ գաղափարական եւ որեւէ ընդհանրություն մենք չունենք: Իսկ կան ուժեր, որոնք ուժեր էլ չեն:
- Ղարաբաղյան կարգավորման շուրջ մենք միշտ խոսում ենք բոլոր թեկնածուների հետ եւ կուզենայինք լսել նաեւ Ձեր դիրքորոշումը: Որովհետեւ կան նաեւ շատ բեւեռային, զիջումներ բացառող դիրքորոշումներ:
- Քաղաքականության մեջ եթե դու մի անգամ ասացիր «երբեք, ոչ մի դեպքում» ու սկսեցիր վերնաշապիկդ պատռել, ուրեմն դու քաղաքականության հետ գործ չունես: Դու պետք է լինես ճկուն ու իմանաս, որ քո գերխնդիրը համընդհանուր ազգային ու պետական շահի պահպանումն է: Դա քեզանից կարող է ճկունություն պահանջել: Սակայն իմ կարծիքով` Ղարաբաղի հարցը հետեւյալ կերպ է ծառայած. Հայաստանը բազմիցս ոչ միայն հայտարարել, այլեւ ապացուցել է իր պատրաստակամությունը փոխզիջումների, իր կողմից զիջումների գնալու: Նրանով է ապացուցել, որ նույնիսկ մտել է այդ զիջումների քննարկման դետալների մեջ, ինչը Ադրբեջանը երբեք չի արել: Ադրբեջանի կողմից մենք միայն լսում ենք` ամեն ինչը կվերադարձնեք մեզ, տարածքային ամբողջականություն, այլապես` կռիվ: Այլընտրանքը` միայն կռիվ:
Ես ի՞նչ կանեմ, եթե դառնամ նախագահ: Ես Ադրբեջանին անմիջապես կառաջարկեմ չհարձակման մասին պակտ ստորագրել: Մենք ո՝չ զինադադար ենք կնքում, ո՝չ էլ, ի վերջո, խաղաղ պայմանագիր: Խաղաղ պայմանագիրը պիտի լինի վերջում, երբ ամեն ինչ քննարկված է: Բայց հիմա կառաջարկեմ կարճ, երկու տողանոց պակտ` պայմանագիր չհարձակվելու մասին: Սա կարող է շատ կարճ լինել, որովհետեւ ուղղակի բխում է Հելսինկյան ակտից, այսօրվա միջազգային կազմակերպությունների պահանջից, որոնք, եւ հատկապես Մինսկի խումբը, բազմիցս մեզ ասում են, որ հարցը պետք է խաղաղ հարթության մեջ լուծվի, ագրեսիվ հայտարարություններ մի՝ արեք: Ընդ որում, զուգահեռ երկուսիս են ասում, բայց հիմնականում Ադրբեջանին է վերաբերում, որովհետեւ Հայաստանից ագրեսիվ հայտարարություններ առանձնապես ոչ ոք չի էլ անում:
Ես կարծում եմ, որ այս առումով ամբողջ միջազգային հանրությունը մեզ դաշնակից է, որովհետեւ մենք վատ բան չենք ասում: Մենք ասում ենք` էլի պատրաստ ենք փոխզիջումների, բայց եկեք սկզբից պայմանավորվենք, որ իրար վրա հարձակվել չկա: Եթե Ադրբեջանը համաձայնում է, այդ ժամանակ նոր միայն Հայաստանը ասում է, որ մենք կարող ենք սա զիջել, եթե իմանանք ձեր զիջման բովանդակությունը: Մենք չգիտենք Ադրբեջանի զիջման բովանդակությունը, ի՞նչ ենք մենք տարածքներ քննարկում, երկաթգծեր, փախստականներ եւ այլն: Ես կարծում եմ, որ մենք այդ աստիճանին դեռ չենք հասել:
ՀՀ ԿԱՌԱՎԱՐՈՒԹՅՈՒՆԸ ՀԱՎԱՆՈՒԹՅՈՒՆ Է ՏՎԵԼ ԶԲՈՍԱՇՐՋՈՒԹՅԱՆ ԶԱՐԳԱՑՄԱՆ ՀԱՅԵՑԱԿԱՐԳԻՆ
Երեւան (Երկիր) - ՀՀ կառավարության` փետրվարի 13-ի նիստում հավանության է արժանացել զբոսաշրջության զարգացման հայեցակարգը: Այն մշակվել է ԱՄՆ Միջազգային զարգացման գործակալության կողմից ֆինանսավորվող «Հայաստանի ...ՀԱՅԱՍՏԱՆՈՒՄ ՆԱԽԱՏԵՍՎՈՒՄ Է ՆԵՐԴՆԵԼ ՖԻՆԱՆՍԱԿԱՆ ՀԱՄԱԿԱՐԳԻ ՀԱՇՏԱՐԱՐԻ ԻՆՍՏԻՏՈՒՏԸ
Երեւան (Երկիր) - ՀՀ կառավարության` փետրվարի 13-ի նիստում հավանության են արժանացել «Սպառողական կրեդիտավորման մասին», «Ֆինանսական համակարգի հաշտարարի մասին» եւ «Բանկային ավանդների ներգրավման մասին» ՀՀ օրենքների ...ՀՐԴԵՀՎԵԼ Է «ԲԵԼԱՎԻԱ» ԸՆԿԵՐՈՒԹՅԱՆ ԵՐԵՒԱՆ-ՄԻՆՍԿ ՉՎԵՐԹՆ ԻՐԱԿԱՆԱՑՆՈՂ ԻՆՔՆԱԹԻՌԸ
Երեւան (Երկիր) - Փետրվարի 14-ին` առավոտյան ժամը 4:30-ին, «Բելավիա» ընկերության CRG-100 ինքնաթիռը «Զվարթնոց» օդանավակայանից Երեւան-Մինսկ չվերթի կատարման ժամանակ ձախ թեւով հարվածել է թռիչքուղուն եւ հրդեհվել: ...ԻՆՔՆԱԹԻՌԻ ՎԹԱՐԻ ԿԱՊԱԿՑՈՒԹՅԱՄԲ ՀՀ ՆԱԽԱԳԱՀԸ ՀՐԱՎԻՐԵԼ Է ԱՐՏԱԿԱՐԳ ԽՈՐՀՐԴԱԿՑՈՒԹՅՈՒՆ
Երեւան (Երկիր) - «Բելավիա» ավիաընկերության Երեւան-Մինսկ չվերթն իրականացնող ինքնաթիռի վթարի կապակցությամբ նախագահ Ռոբերտ Քոչարյանն այսօր հրավիրել է արտակարգ խորհրդակցություն, որին մասնակցել են նախագահի ...ՀԱՅԱՍՏԱՆԻ ԵՒ ՎՐԱՍՏԱՆԻ ԱՐՏԳՈՐԾՆԱԽԱՐԱՐՆԵՐԸ ՔՆՆԱՐԿԵԼ ԵՆ ՀԱՄԱԳՈՐԾԱԿՑՈՒԹՅԱՆ ՀԱՐՑԵՐ
Երեւան (Երկիր) - Մոտ ժամանակներս Հայաստանի եւ Վրաստանի միջեւ կվերսկսվեն բանակցությունները երկու երկրների միջեւ սահմանագծման հարցի շուրջ: Ինչպես հաղորդում Է Հայաստանի հանրային ռադիոն, վկայակոչելով Վրաստանի ...ԺՆԵՒՈՒՄ ԱՆՑԿԱՑՎՈՒՄ Է ԵՀԽ ԿԵՆՏՐՈՆԱԿԱՆ ԿՈՄԻՏԵԻ ՀԱՆԴԻՊՈՒՄԸ
Երեւան (Երկիր) - Փետրվարի 13-20-ը Ժնեւում (Շվեյցարիա) տեղի կունենա Եկեղեցիների համաշխարհային խորհրդի (ԵՀԽ) Կենտրոնական կոմիտեի հերթական հանդիպումը, որին Ն.Ս.Օ.Տ.Տ. Գարեգին Բ Ծայրագույն պատրիարք եւ Ամենայն ...ՎԱՀԱՆ ՀՈՎՀԱՆՆԵՍՅԱՆ. «ԵՍ ԵՒ ԻՄ ԿՈՒՍԱԿՑՈՒԹՅՈՒՆԸ ԿՎԵՐԱԴԱՐՁՆԵՆՔ ՁԵԶ ԱԶԱՏՈՒԹՅՈՒՆԸ»
Երեւան (Երկիր) - «Մենք հպարտանում ենք Արենի գյուղով, որովհետեւ այս բնակավայրը ոչ միայն քաջ եւ հայրենասեր զինվորներ է տվել հայրենիքին, այլեւ հնագիտական բնակավայր է, որը պեղումների արդյունքում կարող է դառնալ ...ՀՀ ՓՈԽԱՐՏԳՈՐԾՆԱԽԱՐԱՐՆ ԸՆԴՈՒՆԵԼ Է ՄԵԾ ԲՐԻՏԱՆԻԱՅԻ ՆՈՐԱՆՇԱՆԱԿ ԴԵՍՊԱՆԻՆ
Երեւան (Երկիր) - Փետրվարի 14-ին ՀՀ ԱԳ փոխնախարար Արմեն Բայբուրդյանին իր հավատարմագրերի կրկնօրինակը հանձնեց Մեծ Բրիտանիայի նորանշանակ դեսպան Չարլզ Լոնսդեյլը, տեղեկացնում են ՀՀ ԱԳՆ մամուլի եւ տեղեկատվության ...ՀՀ-ՈՒՄ ԵՎՐԱՀԱՆՁՆԱԺՈՂՈՎԻ ՊԱՏՎԻՐԱԿՈՒԹՅԱՆ ՂԵԿԱՎԱՐԸ ՀԱՎԱՏԱՐՄԱԳՐԵՐԻ ԿՐԿՆՕՐԻՆԱԿԸ ՀԱՆՁՆԵՑ ՀՀ ԱԳ ՓՈԽՆԱԽԱՐԱՐԻՆ
Երեւան (Երկիր) - Փետրվարի 14-ին ՀՀ ԱԳ փոխնախարար Արմեն Բայբուրդյանին իր հավատարմագրերի կրկնօրինակը հանձնեց ՀՀ-ում Եվրոպական հանձնաժողովի պատվիրակության ղեկավար, դեսպան Ռաուլ դե Լուցենբերգերը, տեղեկացնում ...ՎԱՀԱՆ ՀՈՎՀԱՆՆԵՍՅԱՆ. «ԵՍ ԿԱԽՈՒՄ ՈՒՆԵՄ ՄԻԱՅՆ ԻՄ ԺՈՂՈՎՐԴԻՑ»
Երեւան (Երկիր) - Հայաստանի Հանրային հեռուստաընկերության «Եվրապոլիս» հաղորդաշարի փետրվարի 13-ի հյուրն էր ՀՀ նախագահի թեկնածու, ՀՅԴ Բյուրոյի անդամ, ԱԺ փոխնախագահ Վահան Հովհաննեսյանը: Ստորեւ ներկայացնում ...ՀՐԱՆՏ ՄԱՐԳԱՐՅԱՆ. «ՄԵՆՔ ՄԻԱԿ ԱՆԿԱԽ ՈՒԺՆ ԵՆՔ»
Երեւան (Երկիր) - Փետրվարի 13-ին «Երկիր Մեդիա» հեռուստաընկերության «Երկրի թեման» հաղորդաշարի հյուրն էր ՀՅԴ Բյուրոյի ներկայացուցիչ Հրանտ Մարգարյանը: Ներկայացնում ենք Հրանտ Մարգարյանի հարցազրույցը Վախթանգ ...ԱՐՄԵՆ ՌՈՒՍՏԱՄՅԱՆ. «ԱՅՍ ԸՆՏՐՈՒԹՅՈՒՆՆԵՐԸ ՏԱՐԲԵՐՎԵԼՈՒ ԵՆ ԱՆՑԱԾ ԲՈԼՈՐ ԸՆՏՐՈՒԹՅՈՒՆՆԵՐԻՑ»
Երեւան (Երկիր) - Կանանց` տասից ավելի հասարակական կազմակերպություններ ցանկություն էին հայտնել հանդիպել ՀՅ Դաշնակցության Բյուրոյի անդամ եւ ՀՀ նախագահի թեկնածու Վահան Հովհաննեսյանի հետ: Վերջինս տվել էր իր ...
ՌՈՒԲԵՆ ՍԱՖՐԱՍՏՅԱՆԻ ԿԱՐԾԻՔՈՎ` ՀԱՅԿԱԿԱՆ ԴԻՎԱՆԱԳԻՏՈՒԹՅՈՒՆԸ ՊԱՐՏՎՈՒՄ Է ԹՈՒՐՔԱԿԱՆԻՆ
ՎԵՐՋԻՆ 15 ՏԱՐՎԱ ԸՆԹԱՑՔՈՒՄ ՀԱՅԱՍՏԱՆՈՒՄ ՓԱԽՍՏԱԿԱՆԻ ԿԱՐԳԱՎԻՃԱԿ Է ՍՏԱՑԵԼ 21 ՄԱՐԴ
ՎԱՀԱՆ ՀՈՎՀԱՆՆԵՍՅԱՆԻ ՀԵՏ ԱՐԴԵՆ 224.184 ՀԱՄԱՁԱՅՆԱԳԻՐ Է ԿՆՔՎԵԼ
ԸՍՏ ՀՀ ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԻ` ՀԱՆՐԱՅԻՆ ՀԵՌՈՒՍՏԱՏԵՍՈՒԹՅՈՒՆԸ ԼՈՒՍԱԲԱՆԵԼՈՒ ՓՈԽԱՐԵՆ ԴԱՌՆՈՒՄ Է ԲԵՒԵՌՆԵՐԻՑ ՄԵԿԸ
ԹՈՒՐՔԻԱՆ ՊԱՏՐԱՍՏՎՈՒՄ Է ՎԵՐԱԴԱՐՁՆԵԼ ՔՐԻՍՏՈՆՅԱՆԵՐԻ ԵՒ ՀՐԵԱՆԵՐԻ ՍԵՓԱԿԱՆՈՒԹՅՈՒՆԸ
ՀԱՅԿ ԴԵՄՈՅԱՆ. «ԹՈՒՐՔԻԱՅՈՒՄ ՏԵՂԻ ԵՆ ՈՒՆԵՆՈՒՄ ՊԱՏՄՈՒԹՅԱՆ ՎԵՐԱԿԱՆԳՆՄԱՆ ԽՈՐՔԱՅԻՆ ԳՈՐԾԸՆԹԱՑՆԵՐ»
ՋՈՒՍԹ ԼԱԳԵՆՋԻԿ. «ԴԻՆՔԻ ՍՊԱՆՈՒԹՅԱՆ ԳՈՐԾԻ ՈՉ ԼԻԱՐԺԵՔ ԲԱՑԱՀԱՅՏՈՒՄԸ ՎՆԱՍ ԿՀԱՍՑՆԻ ԹՈՒՐՔԻԱՅԻ ՀԵՂԻՆԱԿՈՒԹՅԱՆԸ»
ԱՅՍՕՐ ՏԵՂԻ ԿՈՒՆԵՆԱ ՀՐԱՆՏ ԴԻՆՔԻ ՍՊԱՆՈՒԹՅԱՆ ԳՈՐԾՈՎ ՀԵՐԹԱԿԱՆ ԴԱՏԱԼՍՈՒՄԸ
ՀՐԱՅՐ ԿԱՐԱՊԵՏՅԱՆ. «ԴԱՇՆԱԿՑՈՒԹՅՈՒՆԸ ՀԱՂԹԵԼՈՒ ԼՈՒՐՋ ՀԱՎԱԿՆՈՒԹՅՈՒՆՆԵՐ ՈՒՆԻ»
ՍԱՇԱ ԱՖՅԱՆԸ ՆՇԱՆԱԿՎԵԼ Է ՈՍՏԻԿԱՆՈՒԹՅԱՆ ՊԵՏԻ ՏԵՂԱԿԱԼ
- 0 Տյառնընդառաջ: Ժողովրդի մեջ այն կոչվում է Տըրընտես, Տերընդեզ կամ Տըրընդեզ:
- 1882 Ծնվեց բանասեր Հայկանուշ Մառքը: (Վախճ. 1966 թ.):
- 1911 Կ. Պոլսի Հայոց Պատրիարք Հովհաննես Արշարունին Թուրքիայի արդարադատության նախարարին ուղղված ուղերձում տեղեկացնում է հայաբնակ գավառներում տեղի ունեցող թուրք պաշտոնատար անձանց անօրինական արարքների, հայերի սպանության և ունեցվածքի հափշտակման մասին:
- 1921 Ղարաքիլիսայում (Վանաձոր) սկսեց գործել գյուղ-շրջիկ թատրոնը՝ Ամո Խարազյանի ղեկավարությամբ:
- 1995 ԱՊՀ երկրների միջխորհրդարանային ասամբլեայի խորհրդի նիստում ստեղծվեց նշված երկրների պետական լրատվական գործակալությունների ղեկավարների խորհուրդ:
ԼՈՒՐԵՐ ՀԱՅԱՍՏԱՆ
ՕՆԼԱՅՆ ԼՈՒՐԵՐ
ԻՆՖՈՐՄԱՑԻԱ
ԻՄ ԱՐՄԹԱՈՒՆ
Ինչպե՞ս թողնել ծխելը
Ինչպե՞ս գրել Հայերեն Windows XP միջավայրում
Սույն կայքում հրատարակված նյութերը վերցված են բաց աղբյուրներից և պաշտպանված են հեղինակային իրավունքիով։ Արգելված է սույն կայքում հրատարակված նյութերի վերարտադրումը առանց իրական հեղինակի գրավոր թույլտվության։ Եթե ցանկանում եք հանել Ձեզ պատկանող նյութը, ապա ուղարկեք մեզ, պատկանելությունը վկայող փաստեր և տվյալ նութը անմիջապես կհանվի։ Բոլոր նյութերը հրատարակված են միայն ինֆորմացիոն նպատակով և մենք պատասխանատու չենք դրանց հավաստիության համար։