ԿԻՈԿՈՒՇԻՆԻ ԱՌԱՋՆՈԻԹՅՈՒՆԸ` «ՄԻԿԱՅԻ» ՀՈՎՀԱՆԱՎՈՐՈՒԹՅԱՄԲ
- «ՄԻԿԱ Քորփորեյշնը», որի ընկերությունները առաջամարտիկներ են Հայաստանի տնտեսության տարբեր ոլորտներում, ավանդաբար գործուն աջակցություն է ցուցաբերում նաեւ հայրենի սպորտին։ Ընդ որում՝ ոչ միայն համանուն ակումբների, մասնավորապես ֆուտբոլի եւ շախմատի կենսագործունեությունն ապահովելով, այլեւ տարբեր մարզաձեւերի միջոցառումների կազմակերպմանը սատարելով։ Օրինակելի այս գործելաոճի հերթական դրսեւորումը դարձավ Ռուբեն Վարդանյանի անվան «Աշխատանք» մարզադահլիճում «Միկա Արմենիա Թրեյդինգ», «Միկա ցեմենտ», «Արմավիա», «Միկա Ինտուր» եւ «Դիլիջան Ֆրոլովա» ընկերությունների հովանավորությամբ կազմակերպված կիոկուշին կարատե-դոյի Հայաստանի բաց առաջնությունը, որին մասնակցեցին նաեւ Ռուսաստանի, Վրաստանի եւ Իրանի թիմերը։
Ստուգատեսը սկսվեց հանդիսավոր արարողությամբ, որը տպավորիչ ելույթներով զարդարեցին «Միկա» պարային համույթը եւ կիոկուշին կարատեի ֆեդերացիայի սաների եւ մարզիչների կատարած ցուցադրական վարժությունները։ Բայց մինչ այդ դրվատանքի խոսքերով հիշվեցին բոլոր այն անձինք եւ կազմակերպությունները, որոնք աջակցել են առաջնության անցկացմանը։ Հատուկ հավաստագիր շնորհվեց «ՄԻԿԱ Քորփորեյշնի» ղեկավար Միքայել Բաղդասարովին։
Մարզադահլիճ եկած տասնյակ հանդիսատեսներն ու հյուրերը առանձնակի հետաքրքրությամբ ակնդրեցին կարատեիստների ցուցադրական ելույթները։ Հատկապես երբ ասպարեզ դուրս եկան սենպայները (մարզիչները), որոնք ցուցադրեցին տարբեր գլխապտույտ հնարքներ կատարելու իրենց հմտությունները։ Զարմանալի էր տեսնել, թե ինչպես է մարդկային ձեռքը մեկ հարվածով կոտրում իրար վրա շարված քարե սալիկներ, ինչպես են մկանները պրկվում այն աստիճան, որ դիմանում են փայտե տախտակների հարվածին, որոնք փշուր-փշուր են լինում զարնվելով կարատեիստների մարմնին։
Պակաս գեղեցիկ չէին կատա վարժությունները, որոնք ակնառու պատկերացում են տալիս այս մարտարվեստի գեղեցկության եւ առանձնահատկությունների մասին։ Իսկ հավաքվածների աշխուժությունը սպորտային ազարտի վերածվեց բուն մրցումների ընթացքում։ Երկրպագուները ջանասիրաբար աջակցում էին մարզիկներին, իսկ երբ մեր որեւէ պատվիրակ մրցում էր հյուրընկալված թիմերի ներկայացուցիչների հետ, դահլիճը ցնցվում էր «Հայաստան» վանկարկումներից։ Եւ պետք է ասել, որ մարզաշապիկի թիկունքին «Միկա» վերտառությամբ մարզիկները միանգամայն արդարացրին սպասելիքները։
Առաջնությունը անցկացվեց չորս տարիքային խմբում։ 10-11 տարեկանների մեջ հաղթող հռչակվեցին Դավիթ Կարապետյանը (թեթեւ քաշային կարգ), Արմեն Աբովյանը (միջին), Գեւորգ Մանուկյանը (միջին+), Սլավիկ Միկոյանը (ծանր), 12-13 տարեկաններ՝ Սարգիս Հակոբյանը (թեթեւ), Դանիիլ Ֆեդչենկոն (միջին, Ռուսաստան), Սերգեյ Մանուկյանը (միջին+), Նարեկ Գաբրիելյանը (միջին++), Վլադիմիր Պոպովը (ծանր, Ռուսաստան), 14-15 տարեկաններ՝ Արտյոմ Սոլովյովը (թեթեւ, Ռուսաստան), Ժորա Կուբոյանը (միջին), Օթար Վարդոսանիձեն (միջին+, Վրաստան), Րաֆֆի Թորոսյանը (ծանր), 16-17 տարեկաններ՝ Սեւակ Հովհաննիսյանը (թեթեւ), Գրիշա Թորոսյանը (ծանր)։ Նշենք, որ չեմպիոնները պարգեւատրվեցին գավաթներով, մեդալներով եւ պատվոգրերով, իսկ բոլոր մասնակիցները ստացան հատուկ մարզաշապիկներ «ՄԻԿԱ Քորփորեյշնի» եւ Հայաստանի կիոկուշին կարատե-դո ֆեդերացիայի տարբերանշաններով։
Աղջիկների մենամարտի առաջին երկու մրցանակակիրներն են Անահիտ Սարգսյանը եւ Ոսկեհատ Ասատրյանը։
Իսկ կատայի մրցանակային եռյակը հաջորդաբար կազմեցին Միկա Մախլաուրին, Սարգիս Հակոբյանն ու Զուրաբ Ճաբաշվիլին։
Առաջնության ավարտին հատուկ մրցանակների արժանացան Նահապետ Սուքիասյանը (հաղթանակի ձգտում) եւ Դանիիլ Ֆեդչենկոն (լավագույն տեխնիկա)։
Ներկայացնելով Հայաստանի կիոկուշին կարատե-դո ֆեդերացիայի գործունեությունը՝ կազմակերպության պատվավոր նախագահ Էդուարդ Ասատրյանը մասնավորապես տեղեկացրեց, որ մարտարվեստը մեր երկրում սկսել է արմատավորվել 2001 թվականից։ Այն ժամանակ զարգացումը սաղմնային՝ ակումբային փուլում էր, ինչը սակայն մարզիկներին չի խանգարել մասնակցել Կովկասի ամենամյա առաջնությանը եւ միջազգային տարբեր մրցաշարերի։ Միայն չորս տարի անց, Եվրոպայում սեմինարի ժամանակ, կիոկուշին կարատե-դո միջազգային ֆեդերացիայի նախագահ Խացուո Ռոյաման (Ճապոնիա, 9-րդ դան), հաշվի առնելով Անդրանիկ Հակոբյանի մարտարվեստը Հայաստանում զարգացնելու ուղղությամբ ծավալած գործունեությունը, նրան է իրավունք շնորհել մեր երկրում հիմնադրել կիոկուշին կարատեի ֆեդերացիան եւ գլխավորել այն։ Այսօր ֆեդերացիան առաջատարներից է մեր հանրապետությունում եւ, մասնագետների հավաստմամբ, ապշեցնում է իր տարածման եւ զարգացման դինամիկայով։ Ըստ Էդուարդ Ասատրյանի, ներկայումս Հայաստանում եւ Արցախում շուրջ 1500 պարապողներ կան այս մարտարվեստում։ Կարճ ժամանակահատվածում շուրջ 12 հայ մարզիկ հասցրել է նվաճել Կովկասի չեմպիոնի տիտղոսը։ Իսկ Կեմերովոյում բնակվող Արսեն Խաչատրյանը Ռուսաստանի հավաքականի կազմում դարձել է Եվրոպայի չեմպիոն։
Ի դեպ, տեղեկացնենք, որ անցյալ դարի 50-ական թվականներին լեգենդար վարպետ Միսուտացո Օյամայի հիմնադրած կիոկուշին կարատեն շատ շուտով ձեռք է բերել եւ առ այսօր պահպանում է մոլորակի ուժեղագույն կարատեի համբավ։ Պաշտոնական տվյալներով, 140 երկրներում այսօր շուրջ 12 մլն մարդ է նախապատվություն տվել մարտարվեստի այս դպրոցին, որը չափազանց բարձր վարկանիշ ունի։ Ուշագրավ է, որ Ռուսաստանում կիոկուշինի ֆեդերացիայի պատվավոր նախագահն է երկրի առաջնորդ Վլադիմիր Պուտինը (5-րդ դան)։
Սակայն վերադառնանք մեր միջոցառմանը։ «Առաջնությունը կազմակերպելիս սերտորեն համագործակցել ենք «ՄԻԿԱ Քորփորեյշնի» հետ, որի շնորհիվ միջոցառումն անցավ մեծ շուքով։ Ծանոթանալով եւ անմիջականորեն շփվելով Միքայել Բաղդասարովի հետ՝ համոզվեցինք, որ նա իրոք սպորտասեր անձնավորություն է։ Մեզ խոստացել են դահլիճային պայմաններ ընձեռել, որպեսզի Շենգավիթի համայնքում ունենանք կիոկուշին կարատեի ֆեդերացիայի կազմում գործող «Միկա» թիմ։ Կարծում եմ՝ այս հարցով, առաջնության ավարտից հետո, ավելի սերտորեն կզբաղվենք»,- նշեց Էդուարդ Ասատրյանը։
Կիոկուշինյան կազմակերպության խորհրդանիշերը շատ խորիմաստ են։ Օրինակ՝ «կան» խորհրդանիշը արտահայտում է մեկ, կուռ ընտանիքի պես համերաշխության եւ համաձայնության մթնոլորտում ապրելու ձգտում։ Միաժամանակ կոչ է անում անհատի մեջ դաստիարակել հարգանք շրջապատող մարդկանց նկատմամբ։ Վերջիվերջո, այդ նպատակն է հետապնդում սպորտն ընդհանրապես, որի միջոցով էլ նշված գաղափարներին, աճող սերնդին փորձում է հաղորդակից դարձնել «ՄԻԿԱ Քորփորեյշնը»։
ԼՈՒՐԵՐ ՀԱՅԱՍՏԱՆ
ՕՆԼԱՅՆ ԼՈՒՐԵՐ
ԻՆՖՈՐՄԱՑԻԱ
ԻՄ ԱՐՄԹԱՈՒՆ
Ինչպե՞ս թողնել ծխելը
Ինչպե՞ս գրել Հայերեն Windows XP միջավայրում
Սույն կայքում հրատարակված նյութերը վերցված են բաց աղբյուրներից և պաշտպանված են հեղինակային իրավունքիով։ Արգելված է սույն կայքում հրատարակված նյութերի վերարտադրումը առանց իրական հեղինակի գրավոր թույլտվության։ Եթե ցանկանում եք հանել Ձեզ պատկանող նյութը, ապա ուղարկեք մեզ, պատկանելությունը վկայող փաստեր և տվյալ նութը անմիջապես կհանվի։ Բոլոր նյութերը հրատարակված են միայն ինֆորմացիոն նպատակով և մենք պատասխանատու չենք դրանց հավաստիության համար։